Category Archives: Ireland 2002

Po‘aono, 20 Iulai, 2002

Hiki ke heluhelu ʻia kaʻu mau mokuna a pau i kākau ai ma ke kōmi ʻana i nā loulou ma ka ʻalemanaka ma ka ʻaoʻao ʻākau o kēia palapala.

Ua hoʻouka ʻia nā kiʻi a pau a māua ʻo Mālia i paʻi ai ma ʻIlelani. E koho i nā loukou “Kiʻi” ma ka ʻaoʻao ʻākau, ma lalo o ka ʻalemanaka. Hoʻokaʻawale ʻia nā kiʻi ma ʻekolu pūʻulu – nā kiʻi i paʻi ʻia ma Dublin, Glen Colm Cille, a me Sligo. E nanea.

 

Po‘akahi, 15 Iulai, 2002

Ua hoʻi māua ʻo Mālia i Dublin i kēia lā, a kau māua ma luna o ke kaʻa ʻōhua no ka hele hou ʻana i Temple Bar. I ka lā ʻapōpō, e kau ana māua ma luna o ka mokulele no ka lele ʻana i Newark, a e noho ana māua ʻelua lā ma Philadelpha no ke kipa ʻana aku i koʻu mau ʻanakē, ʻanakala, a me nā hoahānau he nui. ʻO kēia ana ka mokuna hope aʻu e kākau ana no kēia puke moʻomanaʻo; e kākau paha au i kekahi pepa pela manaʻo no ka huakaʻi ma hope.

Lāpule, 14 Iulai, 2002

Ua neʻe māua mai ka hōkele ʻo Riverside ma Sligo a i Markree Castle. He hale kahiko loa kēia i kūkulu ʻia 350 makahiki aku nei, a he moʻopuna ke kanaka nona ka hale na ke kanaka nāna i kūkulu. I loko nō o ke kahiko o ka hale, ua nani nō ʻo loko, a loaʻa ka uila, kelepona a me nā mea ʻē aʻe e pono ai ka poʻe e kipa mai ana. ʻAʻohe mea e hana ai ma kahi o Markree, a ʻoiai he Lāpule kēia, ua noho wale nō māua ma ʻaneʻi me ka nānā kīwī. I ka lā ʻapōpō, e hoʻi ana māua i Dublin ma luna o ke kaʻa ahi.

Po‘aono, 13 Iulai, 2002

ʻO nehinei ka hālāwai hope ʻana o kā māua papa ʻŌlelo ʻAiliki, a me kaʻu hui hope ʻana me Paddy no ke aʻo ʻana i ka hoʻokani bodhrán. I ka wā a māua i hui ai, ua kipa mai kekahi mea kākau o ka nūpepa ma Glen Colm Cille. Ua paʻi ʻo ia i mau kiʻi o māua, a ma kaʻu pela ʻana i koʻu inoa hope no ia kanaka, ua pūʻiwa loa ʻo Paddy. ʻO Ó Donaghue kona inoa hope, akā, i kona wā ʻōpio ua neʻe ʻo ia me kona makua kāne i ʻIlelani ʻĀkau. Kaulana ka ʻohana Ó Donaghue i ke kūpaʻa ma hope o ka Lepupalika ʻo ʻIlelani, no laila, ua hoʻololi ko Paddy makuakāne i ka pela ʻia ʻana o kona inoa, a ʻo Donaghy ka pela hou ʻana.Ua noi ʻia māua ʻo Mālia e hīmeni i kekahi mea no ka hōʻikeʻike o kēia pō, ʻoiai ʻo kēia kā māua lā hope ma Oideas Gael. Hīmeni aku nei ʻo Mālia iā “Pua Līlia,” a ua oli aku au iā “Ua Ao Hawaiʻi” me ka wehewehe ʻana i ka manaʻo o nā mele ʻelua. Nui ka uē ʻana o ka poʻe he nui i ka pau ʻana o kēia pule, a me ka haʻalele ʻana o ka poʻe i ka lā ʻapōpō. Nui ka poʻe i hele i Biddy’s, akā, ua koho māua e noho ma ka hale a hoʻomaha no ke kalaiwa ʻana i ke kalana ʻo Co. Sligo. Na kekahi hoa hale e lawe iā māua, ʻoiai aia kona hale ma kekahi ʻaoʻao aʻe o Co. Sligo. ʻElua a ʻoi iki aku hola ka lōʻihi o ke kalaiwa ʻana.

Ma hope o ka ʻai pū ʻana i ka ʻaina awakea me Barbara (ko māua hoa hale ma Oideas Gael), ua hele wāwae māua ma ke kaona ʻo Sligo. Ma kekahi hale kūʻai a māua i kipa aku ai, lohe ʻo Mālia i ke kihe ʻana o kekahi kanaka, a ʻōlelo ʻo ia “Dia linn” (ʻo “God be with all of us” ka manaʻo, a ʻo ia ke ʻōlelo ʻia ke kihe ke kanaka). Ua manaʻo au e ʻakaʻaka, ʻoiai ʻaʻole au i lohe i kekahi kanaka e ʻōlelo ʻAiliki ana ma Sligo, akā, ua pane ke kanaka “Go raibh maith agat” (“Mahalo!”). ʻAʻole au i ʻike i ka helehelena o ke kanaka ma kāna pane ʻana, akā, pūʻiwa paha ʻo ia i kā kekahi wahine Pilipino e ʻōlelo ʻAiliki ana iā ia.

Ma ka kā māua hele ʻana ma ke kaona, ua ʻike māua he hale inu pia, a ʻo Donaghy’s kona inoa. Ua kū māua no ke paʻi ʻana i kekahi kiʻi, a puka mai kekahi kanaka ma ka ʻōlelo “makemake anei ʻolua e paʻi i kiʻi oʻu i mua o ka hale?” ʻAkaʻaka māua, a ma ka walaʻau pū ʻana me ia, ʻike māua ʻo Andy Donaghy kona inoa. Komo mākou ʻekolu no ka walaʻau ʻana, a haʻi mai ʻo ia iā māua no ʻIlelani ʻĀkau kona ʻohana, a ua neʻe mai lākou i Sligo ma ke kenekūlia ʻumikūmāiwa. ʻAʻole i makemake ʻia ka inoa ʻo Donaghy ma ka Lepupalika ʻo ʻIlelani, no ka mea, he inoa ʻIlelani ʻĀkau ia. Eia naʻe, kaulana kona hale inu pia a hale ʻaina, a nui ka poʻe hele mai no ka ʻai ʻana ma laila. Ua hoʻi māua i ia hale ʻaina no ka ʻaina ahiahi, a hewa ka waha i ka ʻono o ka mea ʻai. ʻO Andy ka mea kuke o ka hale kūʻai kekahi, a he mau mea ʻai ʻĪkālia ka hapanui.

Po‘alima, 12 Iulai, 2002

Mai ka lā a māua i hiki mai ai i Glen Colm Cille, ua hoʻāʻo au e nīnauele iā Liam Ó Cuinneagáin, ka luna o Oideas Gael. He kanaka paʻahana loa ʻo ia, a ua hoʻopaneʻe ʻia kā māua hālāwai ʻana he mau manawa, akā naʻe, ua walaʻau māua ma ka ʻaina awakea i kēia lā.

He mānaleo ʻōlelo ʻAiliki ʻo ia, a pēlā nō hoʻi kona mau mākua, kona mau kūpuna, a me nā haunauna ma mua. Ma Glen Colm Cille ʻo ia i hānau ʻia ai, a ua hele ʻo ia i nā kula o ka Gaelteacht ma ʻaneʻi. Ma hope o ka loaʻa ʻana o kāna palapala puke, ua komo ʻo ia i kekahi kula no ka loaʻa ʻana o kona kēkelē hoʻonaʻauao, e hiki ai iā ia ke aʻo ma ke kula haʻahaʻa. ʻO ia kāna i hana ai no iwakālua makahiki, a ua lilo ʻo ia i poʻo kumu o kekahi kula ʻōlelo Pelekāne ma Dublin. Ma nā ahiahi a pau a me nā hopenapule, ua aʻo ʻo ia i nā papa ʻōlelo ʻAiliki. He kupuʻeu ʻo ia, a nui kāna hoʻopilikia ʻana i ke Keʻena Hoʻonaʻauao o ke aupuni ma muli o ke ʻano o ka mālama ʻia o ka ʻōlelo ʻAiliki. Ua koi ʻia ke aʻo ʻana i ka ʻōlelo ʻAiliki, akā, ʻaʻole i maikaʻi nā moʻohaʻawina, ʻaʻole i mākaukau nā kumu no ke aʻo ʻana i ka ʻōlelo ʻAiliki, a i loko o nā kauoha e heleleʻi mai ana mai nā luna o ke Keʻena Hoʻonaʻauao, ʻaʻole i ikaika ke kākoʻo ʻia o nā papahana ʻōlelo ʻAiliki. Nā Liam me kekahi o kona mau hoalike i hoʻokumu iā TG4, ke kānela hoʻolele kīwī ʻōlelo ʻAiliki. ʻAʻole i kākoʻo nui ʻia ia papahana e ke aupuni kekahi.

Ma ka makahiki 1984, ua hoʻomaka ʻo ia e aʻo i nā papa ʻōlelo ʻAiliki ma Glen Colm Cille ma nā kauwela; ʻo ia ka hoʻomaka ʻana o Oideas Gael. Ua ʻimi ʻo ia i kekahi kālā kūikawā e kākoʻo ana i nā wahi ma kahi e pili ai ka Lepupalika ʻo ʻIlelani a me ʻIlelani ʻĀkau. He 54,000 £ ka nui o ke kālā i hāʻawi ʻia, a ua ʻāpono ʻia he noi no 70,000 £ hou e kekahi panakō. Ma ka hoʻomaka ʻana, ua mālama ʻia nā papa ma ke kula haʻahaʻa o Glen Colm Cille, a ma ka makahiki 1994, ua kūkulu ʻia ke kikowaena ʻo Oideas Gael, kahi a mākou e aʻo ana i kēia manawa. Ma ia makahiki, ua ʻāpono ʻia kona kapaiakala (wā hoʻonui ʻike kumu); ʻelima makahiki ka lōʻihi loa i hiki iā ia ke hoʻomaha me ka mālama ʻia o kona kūlana hana ma ka ʻōnaehana aupuni. Akā, ma ka makahiki 1999, ua koho ʻo ia e haʻalele i ia kūlana hana no ka hoʻi ʻana mai i Glen Colm Cille, no ke alakaʻi piha ʻana iā Oideas Gael, a me ka hoʻoikaika ʻana i nā pāʻoihana ma ia wahi. Nui ka poʻe i haʻalele iā Glen Colm Cille ma muli o ka liʻiliʻi o nā kūlana hana.

I kona manaʻo, ua nui aʻe ka ikaika o ka ʻōlelo ʻAiliki ma ʻIlelani, akā, ua nāwaliwali nā Gaelteacht, a nui nā kumu no kēia nāwaliwali – ke komo ʻana o ka poʻe i hiki ʻole ke ʻōlelo ʻAiliki, ka haʻalele ʻana o ka poʻe mānaleo, ke kīwī a me nā ʻano papaho ʻōlelo Pelekāne, a pēlā aku. ʻAʻole ʻo ia i hauʻoli i nā kulekele o ke aupuni ma nā kula, akā, ʻike ʻo ia inā ʻaʻole i koi ʻia ke aʻo ʻana ma o ka ʻōlelo ʻAiliki ma hope o ka hoʻokumu ʻia o ke aupuni kūʻokoʻa ʻo ʻIlelani, a me ke koi ʻia o ke aʻo ʻana i ka ʻōlelo ʻAiliki a hiki i kēia manawa, ua halapohe nō ka ʻōlelo. ʻAʻohe ona kānalua i kēia.

ʻO ka pilikia nui o ka ʻōlelo i kēia manawa, ʻo ia ka nāwaliwali o nā papa ma nā kulanui. Mau nō ka manaʻo o kekahi poʻe ʻaʻole pono e aʻo i ka ʻōlelo ʻAiliki ma ka pae haʻahaʻa, no ka mea, ua mākaukau ka ʻōlelo a nā haumāna e komo ana i nā kulanui. ʻAno mākaukau nō nā haumāna ma ka heluhelu ʻana a me ke kākau ʻana, akā, ʻaʻole i hiki i ka hapanui o lākou ke walaʻau iki.

ʻŌlelo ʻo ia hiki ke ʻoka ʻia nā pila kīkoʻo ma ka ʻōlelo ʻAiliki, a ʻae ʻia nā pila kīkoʻo i kākau ʻia ma ka ʻōlelo ʻAiliki. Hiki ke noi e hoʻouna ʻia ka pila uila, kelepona a me nā ʻano mea like ʻole ma ka ʻōlelo ʻAiliki, akā, pono e noi. Inā ʻaʻole i koho ʻia ka ʻōlelo ʻAiliki, hoʻouna ʻia ma ka ʻōlelo Pelekāne. No ke kānāwai “Language Rights Bill,” kākoʻo nui ʻo ia i ia kānāwai, a manaʻo ʻo ia e puka ana nō, akā, manaʻo ʻo ia ʻaʻole e kākoʻo piha ʻia ana e ke aupuni me ka namunamu ʻole ʻana o ka poʻe he nui. Pono ka lehulehu e kū a kauoha i ke aupuni e kākoʻo i ke kānāwai. Inā ʻaʻole pēlā ka hana a ka poʻe ʻōlelo ʻAiliki, he pepa wale nō ke kānāwai, a e mau ana ka moloā o ke aupuni ma ke kākoʻo ʻana i ka ʻōlelo. No nā papahana ʻōlelo ʻAiliki ʻē aʻe, pono lākou e hoʻoikaika i nā haʻawina a me ka hoʻokaʻaʻike ma waena o lākou.

Po‘ahā, 11 Iulai, 2002

Ua nui ka maikaʻi o ka ʻaha mele i ka pō nei. Ua hīmeni a hoʻokani kikā ʻo Paddy me kekahi mau kānaka hoʻokani waiolina, he hoʻokani banjo, he wahine a he kāne hīmeni “sean nos.” He ʻano hīmeni kahiko ka “sean nos” i hīmeni ʻia me ke kākoʻo ʻole ʻia e nā pila, a ʻo “kaila kahiko” ka manaʻo o “sean nos” ma ka ʻōlelo ʻAiliki. Ma ka ʻōlelo ʻAiliki kekahi o nā mele, a ma ka ʻōlelo Pelekāne kekahi mau mele ʻē aʻe.
Ma hope o ka papa o ke kakahiaka, ua hālāwai pū au me kekahi polopeka ʻōlelo ʻAiliki e noho ana ma Milwaukee, ʻo John Gleason kona inoa, a no Dublin mai ʻo ia. He mānaleo ʻōlelo ʻAiliki kona makuahine, a i kona wā ʻōpio, ua walaʻau nō kona makuahine iā ia ma ka ʻōlelo ʻAiliki. ʻAʻole naʻe i kauoha ʻia ʻo ia e ʻōlelo ʻAiliki; ua nanea wale nō ʻo ia i ka ʻōlelo, a haʻaheo ʻo ia i kona mākaukau ma ka ʻōlelo.

Ua pau ka hele kula ʻana ma hope o ka piha ʻana o nā makahiki he 14 iā ia. Ma hope o ka puka ʻana, hoʻomaka ʻo ia a hana ma ka hale hana pia ʻo Guinness. ʻAʻole ʻo ia i hauʻoli loa i ka hana, akā, he kūlana hana maikaʻi ia, a ua lawa ʻo ia i ke kālā i uku ʻia. Ua hoʻokuʻu ʻia nā ʻōpio ʻelua manawa o ka pule inā hoihoi lākou i nā papa hoʻonui ʻike, a pēlā kāna i hana ai a loaʻa iā ia kona kēkelē hōʻoia (ua like ia palapala me ka palapala i hāʻawi ʻia i nā haumāna e puka ana ma nā kula kiʻekiʻe ma ʻAmelika). ʻO ka mea kupanaha loa, ua noho ʻo ia no nā hōʻike ma nā ʻōlelo ʻelua – ka ʻōlelo Pelekāne a me ka ʻōlelo ʻAiliki. ʻO ka maʻamau, noho nā haumāna no nā hōʻike ma hoʻokahi wale nō ʻōlelo. I kekahi wā ua maʻi loa ʻo ia, a kauoha ʻia ʻo ia e ke kauka ʻaʻole e inu pia a lama no ʻekolu mahina. Paʻakikī maoli no kēia, no laila, ua koho ʻo ia e komo i kekahi papa hoʻoikaika ʻōlelo ʻAiliki ma Dublin. Pēlā ʻo ia i launa mua ai me Liam Ó Cuinneagáin, a pēlā nō hoʻi i ulu hou aʻe ai kona aloha no ka ʻōlelo (ma kahi o ka makahiki 1977 kēia). Ma kahi o ia wā ua hoʻokuʻu ʻia ka poʻe he nui ma Guinness, a ua koho ʻo ia e neʻe lāua ʻo kāna wahine i Milwaukee, kahi i hānau ʻia ai kāna wahine. Ua ʻimi ʻo ia i mau kēkelē ma ka hoʻokaʻaʻike (BA), ka mōʻaukala (MA) a me ka hoʻopaʻa kiʻiʻoniʻoni (MFA). Ua hoʻomaka ʻo ia e aʻo i nā papa ʻōlelo ʻAiliki ma ke ʻano he papa kaiaulu ma ke ahiahi, a ma hope, ua aʻo ʻo ia i nā papa ʻōlelo ʻAiliki (makahiki mua a ʻelua), ma ke kulanui (ma kahi o ka makahiki 1985 kēia). Ma kahi o ia wā, ua hoʻomaka ʻo ia e hoʻolālā i nā huakaʻi i ʻIlelani no ka poʻe i hoihoi i ka ʻōlelo ʻAiliki a me nā haʻawina Celtic. Hoʻāʻo ʻo ia e hele i ʻIlelani i kēlā me kēia kauwela, me ka lawe pū ʻana i nā haumāna.

Ua kōkua ʻo ia i ka hoʻokumu ʻia o ke Kikowaena Haʻawina Celtic ma ke Kulanui o Wisconsin ma Milwaukee. ʻElua ʻano palapala hōʻoia i hāʻawi ʻia e ia kikowaena – he ala ʻōlelo ʻAiliki kekahi, a he ala moʻomeheu kekahi. Inā koho ka haumāna i ke ala ʻōlelo ʻAiliki, pono e pau nā makahiki ʻelua o ka ʻōlelo i ka hele ʻia, me ke komo ʻana i kekahi mau papa haʻawina Celtic ma ka pae makahiki ʻekolu a ʻehā paha. No nā haumāna e ʻimi ana i ka palapala ma ke ala moʻomeheu, pono hoʻokahi wale nō makahiki o ka ʻōlelo ʻAiliki. Makemake ʻo ia e hoʻokumu ʻia he papahana BA a MA paha, akā, ʻaʻole i kākoʻo ʻia ia manaʻo e kekahi o nā lālā o ka papa alakaʻi o ka ʻōnaehana kulanui o Wisconsin, no laila, ʻaʻole e puka ana. ʻŌlelo ʻo ia e pili ana i ke kulanui ma Milwaukee a me ke kulanui ma Madison, a me ke ʻano o kāna i wehewehe ai no ka hakakā ʻana, ua like nō ke ʻano o ka pilikia me ka pilikia ma waena o nā kulanui ma Hilo a me Mānoa. ʻOi aku ka nui o ke kulanui ma Madison, a ma laila e noho ai ka pelekikena o ka ʻōnaehana kulanui ma Wisconsin a me ka papa alakaʻi o ka ʻōnaehana.

Nui ko John hoihoi i ka lohe ʻana e pili ana i kā kākou mau papahana ʻōlelo Hawaiʻi, a ahuwale ka like o kekahi o nā polokalamu me nā polokalamu hoʻōla ʻōlelo ʻAiliki ma ʻIlelani. Ua lohe ʻo ia e pili ana i ka ʻaha haʻawina Celtic e mālama ʻia ana ma Hawaiʻi ma Pepeluali, a inā loaʻa ke kālā i kona keʻena, makemake ʻo ia e hele.

Ke mālama ʻia nei he pāʻina hulahula Ceili ma ke kikowaena kaona ma Glen Colm Cille i kēia pō, akā, nui ko māua luhi, a ua koho au e noho ma ka hale a kikokiko e pili ana i ka hui ʻana me John Gleason. ʻO ka lā ʻapōpō (he Poʻalima) ka lā hope o kā māua mau papa ma Oideas Gael, a laila, e haʻalele ana māua no Co. Sligo. ʻAno kaumaha au i ka haʻalele ʻana i kēia wahi, akā, he lōʻihi nō kēia huakaʻi, a haʻo ʻia nā keiki a me nā hoa ma Hilo.

Po‘akolu, 10 Iulai, 2002

Ua nīnauele ʻia au i kēia lā e kekahi wahine kākau kolamu o ka nūpepa ʻōlelo ʻAiliki ʻo “Foinse” ma ke kelepona. He hoa ʻo ia na Liam, ka luna o Oideas Gael, a ma ka Liam haʻi ʻana iā ia aia kekahi poʻe no Hawaiʻi e aʻo ana i ka ʻōlelo ʻAiliki ma ke kula, ua makemake kēia wahine e ʻike i ke kumu a māua i hele mai ai no ke aʻo ʻana i ka ʻōlelo ʻAiliki. Nui kona hoihoi i ka lohe ʻana e pili ana i ka papahana kaiapuni Hawaiʻi, nā polokalamu ʻōlelo Hawaiʻi ma ke kulanui, a pēlā aku. Pūʻiwa ʻo ia ma kaʻu haʻi ʻana iā ia ʻaʻohe o māua koko Hawaiʻi, akā, ua komo kā māua keiki i loko o ka papahana kaiapuni Hawaiʻi, no laila, nui kā māua walaʻau ʻana no nā kumu i hoʻouna ʻia ai ʻo Mālia kaikamahine i ke kula ʻo Nāwahīokalaniʻōpuʻu. ʻAʻole ʻo ia ʻike āhea e paʻi ʻia ai kāna kolamu, akā, ʻōlelo ʻo ia e hoʻouna nō ʻo ia i kope iaʻu ma Hawaiʻi. ʻO Foinse ka nūpepa ʻōlelo ʻAiliki nui o ke kūʻai ʻia aku ma ʻIlelani; paʻi a kūʻai ʻia ma kahi o ka 7,000 kope i kēlā me kēia pule.
Ma hope o ka papa ua nīnauele aku au i kekahi polopeka no ke kulanui o Wisconsin ma Milwaukee, ʻo Brian ó Brion kona inoa. No ʻIlelani mai ʻo ia, a he haumāna ʻo ia ma kekahi o nā kula kaiapuni ʻōlelo ʻAiliki, a nui nā mea hoihoi āna i haʻi mai ai. Ua neʻe ʻo ia i ʻAmelika no ka ʻimi ʻana i kona mau kēkelē kulanui (he kēkelē kauka kona ma ka ʻōlelo Pelekāne o ka wā kahiko). Ua haʻi mua mai ʻo ia iaʻu i ka mōʻaukala o nā kula ma ʻIlelani, me ke kālele ʻana ma nā kula ʻōlelo ʻAiliki i hoʻokumu ʻia ma hope o ka makahiki 1921, ka wā i hoʻokumu ʻia ai ka Lepupalika ʻo ʻIlelani.

Ma kona wā i hele ai i ke kula, ua loaʻa ʻehā wale nō kula ʻōlelo ʻAiliki piha ma waho o nā Gaelteacht (kahi i mālama ʻia ai ka ʻōlelo ʻAiliki ʻo ia ka ʻōlelo mua a ka poʻe a pau). Hoihoi ka mōʻaukala o ka ʻōlelo i loko o kona ʻohana. ʻAʻole kona kupuna wahine he mānaleo, akā, ua aʻo ʻo ia i ka ʻōlelo ʻAiliki ma kahi o ka hoʻokumu ʻia o ka lepupalika, a ua hāpai aloha ʻo ia i ka ʻōlelo me he hae lā o nui o kona aloha ʻāina a aloha lāhui. Ua hoʻouna ʻia ko Brian makua kāne i kekahi kula ʻōlelo ʻAiliki, akā, ʻaʻole i ʻōlelo ʻAiliki ko Brian kupuna wahine i kona makuakāne; he ʻōlelo Pelekāne wale nō kā lāua i walaʻau ai. Eia naʻe, ma ka hai ʻia o kekahi mau wāhine e kona kupuna wahine no ka hoʻomaʻemaʻe ʻana i ko lākou hale, he mau wāhine ʻōlelo ʻAiliki lākou, a koi ʻia lākou e ʻōlelo ʻAiliki i ko Brian makua kane. Haʻi ʻia akula ʻo Brian e kona makuakāne, ʻaʻole ʻo ia i makemake iki i ka ʻōlelo ʻAiliki, akā, ua makemake kona makuakāne e hoʻouna ʻia ʻo Brian i kekahi kula i ikaika ke aʻo ʻana ma o ka ʻōlelo ʻAiliki. ʻŌlelo ʻo ia, nui ka huikau o ka poʻe ʻAiliki i ka ʻōlelo ʻAiliki. Manaʻo ka poʻe he nui he ʻōlelo ia o ka poʻe naʻaupō a ʻilihune, akā, makemake nui lākou e hoʻouna ʻia kā lākou mau keiki i nā kula Gaelscoil.

ʻO ka mea hoihoi loa, ʻōlelo ʻo Brian ʻaʻohe ona makaʻu no ke ola mau o ka ʻōlelo ʻAiliki. He mea nui iā ia ka nui o ka poʻe naʻauao e ʻōlelo ʻAiliki ana, a pēlā pū nō hoʻi kona manaʻo no ka ʻōlelo Hawaiʻi. Pono ka poʻe e makemake ana e hoʻōla i kā lākou mau ʻōlelo e ʻimi i ka naʻauao. Nui ka poʻe naʻauao ma ʻIlelani i hiki ke ʻōlelo ʻAiliki ma ke kaiaulu (nā loio, nā alakaʻi o ke aupuni, nā kauka, a pēlā aku), a he mea nui lākou. Inā he poʻe ʻilihune a naʻaupō wale nō ke ʻōlelo ana i ka ʻōlelo, e halapohe ana paha. Nīnau maila ʻo ia iaʻu no ka nui o ka poʻe ʻōlelo Hawaiʻi e ʻimi ana inā kēkelē ma ke kulanui, a haʻi aku nei au au iā ia i ka hoʻokumu ʻia o kā kākou mau polokalamu muapuka a mulipuka, a me ka hoʻomākaukau ʻia o nā keiki kaiapuni no ke komo ʻana i nā kulanui. ʻŌlelo ʻo ia he maikaʻi kēlā; pono kēia ʻano poʻe naʻauao no ka pono o ka ʻōlelo. Ma ka mōʻaukala o ka ʻōlelo ʻAiliki, he mea nui ke ola o ka ʻōlelo ma nā Gaelteacht. I kona manaʻo, inā ʻaʻole i mālama ʻia ka ʻōlelo ʻAiliki ʻo ia ka ʻōlelo makuahine o ka poʻe ma ia mau wahi, inā ua halapohe nō ka ʻōlelo.

Wahi āna, ke kūkākūkā ʻia nei he kānāwai kākoʻo kūhelu no ka ʻōlelo (“Language Rights Bill”) e ke aupuni o ʻIlelani, a ʻaʻohe ona kānalua o ka puka ʻana o ia kānāwai. Aia a puka, e koi ʻia ana ke aupuni e kākoʻo i ka ʻōlelo ma nā keʻena aupuni. Ke komo kekahi kanaka i loko o kekahi keʻena aupuni a makemake ʻo ia e ʻōlelo ʻAiliki, e pono ana kekahi e kōkua iā ia ma ka ʻōlelo ʻAiliki. Nui ka poʻe e kūʻē ana i ia kānāwai, akā, lawa ke kākoʻo ʻia o ia kānāwai no ka puka ʻana me ka maʻalahi loa. Ua noi au e hāʻawi mai ʻo ia iaʻu i kope o ia kānāwai, a e hoʻāʻo ana ʻo ia e hana i kope iaʻu ma mua o kaʻu haʻalele ʻana.

Manaʻo ʻo ia he mea nui ka ikaika o nā keʻena papaho i ke ola o kekahi ʻōlelo. He mau hale hoʻolele lēkiō ma ka ʻōlelo ʻAiliki, hoʻolele ʻia kekahi ma ka pūnaewele puni honua, he kānela kīwī ma ka ʻōlelo ʻAiliki (TG4) i nānā ʻia e ka poʻe he nui, a he mau nūpepa i paʻi ʻia ma ka ʻōlelo ʻAiliki (ʻo Foinse ka mea nui o ia mau nūpepa).

ʻAʻole ʻo ia i hauʻoli i ka hana o ke aupuni a me nā kulekele i hoʻopaʻa ʻia no ka hoʻōla ʻana i ka ʻōlelo i ka wā kahiko, a mau ka pilikia a hiki i kēia manawa. Kohu mea lā, ʻaʻole ʻike ka poʻe e alakaʻi ana i ia mau keʻena i ka ʻokoʻa o ke aʻo ana i ka poʻe mānaleo a mānaleo ʻole ma o ka ʻōlelo ʻAiliki. ʻAkahi a paʻi ʻia he puke aʻo ʻōlelo ʻAiliki hou no ke aʻo ʻana i ka ʻōlelo ʻAiliki ma nā kula haʻahaʻa a pau o ʻIlelani, a na nā haumāna ma nā kula ʻōlelo Pelekāne wale nō ia puke. ʻAʻole ia he puke kūpono no nā haumāna mānaleo ʻAiliki, akā, ʻaʻohe puke ʻē aʻe e hoʻohana ai ma ke kula. Hōʻole ke aupuni i ke paʻi ʻana i nā puke hou no nā mānaleo wale nō, me ka manaʻo e “Ghetto-ized” ʻia ana ka poʻe o ia mau kaiaulu.

Ma ka ʻōnaehana hoʻonaʻauao o ʻIlelani, hoʻokaʻina ʻia nā kula ma waho o nā kula Gaelscoil ma ʻekolu waeʻano – A, B a me C. ʻO nā kula “A” nā kula ikaika o ke aʻo ʻana i ka ʻōlelo ʻAiliki a ma o ka ʻōlelo ʻAiliki. Emi mai ka ikaika o nā kula “B,” a nāwaliwali nā kula “C.” Hāʻawi ʻia kekahi kālā kūikawā i nā kula “A, emi mai ia ʻano kālā i hāʻawi ʻia i nā kula “B,” a ʻaʻohe kālā i hāʻawi ʻia i nā kula “C.” No ia kumu, nui nā kula e ʻōlelo ana he mau kula “A” lākou, akā, wahi a Brian, nāwaliwali loa lākou ma ke aʻo ʻana i ka ʻōlelo, a ma o ka ʻōlelo ʻAiliki. Makemake wale nō lākou i ke kālā. ʻO nā kula Gaelscoil nā kula lako o nā kula a pau, akā, ʻaʻole i lawa ke kālā i hāʻawi ʻia.

He ʻaha mele ma ke kula i kēia pō, a e hoʻokani ana ʻo Paddy mā ma Biddy’s ma hope. ʻOiai ʻo kēia kā māua pule hope ma Glen Colm Cille, e hele ana nō māua ʻo Mālia.

Po‘alua, 9 Iulai, 2002

ʻAʻole au e kākau nui ana no ka papa ʻōlelo o kēia, lā. Nui ʻino nā mea hou a ke kumu i aʻo ai – he mau analua paʻakikī a pohihihi loa iaʻu.
Ma ke ahiahi ua ʻākoakoa mai mākou a pau ma ka lumi nui o ke kula no ka hoʻolohe ʻana i kekahi haku poema kaulana o ʻIlelani, ʻo Cathal Ó Searcaigh kona inoa. Nui kāna haʻi moʻolelo ʻana ma waena o kāna mau poema, a hoihoi nō kāna mau manaʻo i hoʻopuka ai. Ua walaʻau ʻo ia no nā wahi pana, a ma ke kapa ʻia ʻana o ia mau wahi e ke aupuni ʻEnelani ma ka ʻōlelo Pelekāne ma ke kenekūlia ʻumikūmāiwa. He mea nui iā ia ka mālama a hoʻohana ʻia o ka inoa pololei o ia mau wahi, he mau inoa ʻAiliki.

He māhū ʻo Cathal, a nui ka walaʻau ʻana o ke aloha o ke kāne no ke kāne i loko o kāna mau poema i haku ai. Makemake au e wehewehe i koʻu manaʻo no kēia huaʻōlelo ʻo “māhū,” a me kaʻu hoʻokomo ʻana i ia huaʻōlelo i loko o kēia mokuna. I koʻu manaʻo, ʻaʻohe hewa o ka māhū ʻana ma ka noʻonoʻo Hawaiʻi, a ʻaʻole i hoʻopuka ʻia ia ʻōlelo ma ke ʻano he hoʻokae māhū ma kaʻu kākau ʻana. No ka hoʻohana ʻia o ia ʻōlelo e ka poʻe ʻōlelo Pelekāne ma ke ʻano he hoʻokae māhū, he mea ia i lawe ʻia mai ma waho o Hawaiʻi, i koʻu manaʻo. Ua hoʻolaha ʻia ko Cathal māhū ʻana ma mua o kona hōʻea ʻana aku i ke kula, ma muli paha o ka makaʻu o nā alakaʻi o ke kula ʻaʻole paha e makemake ana kekahi poʻe e lohe i kāna mau mele i haku ai no ia kumuhana. Kohu mea lā, he mea ʻole kēia i nā haumāna; ua piha ka lumi.

E like me nā mele Hawaiʻi, ʻaʻole i ahuwale ka manaʻo o kāna mau poema; he kaona nō ko nā poema, a hūnā ʻia ka manaʻo i loko o kāna walaʻau ʻana no ke ao kūlohelohe, a i ʻole ma ke ʻano o ka ʻai ʻana i ka mea ʻai. ʻAkaʻaka maoli nō ka poʻe i kāna wehewehe ʻana i ka manaʻo i hūnā ʻia; ʻaʻohe poʻe i haʻalele i ka hilahila. Ua heluhelu ʻo ia i ka hapanui o nā poema ma ka ʻōlelo ʻAiliki, me ka heluhelu ʻana i ka unuhi ʻōlelo Pelekāne kekahi. ʻO kekahi mea hoihoi, i loko nō o ka maikaʻi o kāna ʻōlelo Pelekāne, ua unuhi ʻia kāna mau mele e kekahi mau poʻe ʻē aʻe. ʻŌlelo ʻo ia, ʻaʻole ʻo ia i makemake e unuhi i kāna mau poema i haku ai ma ka ʻōlelo ʻAiliki, no ka mea, makaʻu ʻo ia e loli ana kāna haku ʻana ma ka ʻōlelo ʻAiliki, me ka makaʻala ʻana i nā huaʻōlelo āna i koho ai ma muli o ka pohihihi o ka manaʻo ma ka ʻōlelo Pelekāne. Ua nui nō ka poʻe mai ʻō a ʻō o ke awāwa i hele mai, ʻaʻole he mau haumāna ʻōlelo ʻAiliki ka poʻe a pau i hele mai.

Ma hope o ka hoʻi ʻana i ka hale ma ke ahiahi, ua hoʻomaka au e heluhelu i kekahi puke aʻu i kūʻai ai ma ka hale kūʻai puke o ke kula. ʻO “Compulsory Irish” ka inoa o ia puke, a wahi a ka lohe, he puke ia e hoʻohalahala ikaika ʻana i ka poʻe e alakaʻi ana i ke aukahi hoʻōla ʻōlelo ʻAiliki mai ka pau ʻana o ke kenekūlia ʻumikūmāiwa a hiki i ka makahiki 1973. Ua pau nā ʻaoʻao mua he kanalima i ka heluhelu ʻia, hiki ke ʻike ʻia ka nui o ka noiʻi ʻana a kēia kāne (ua hoʻomaka kēia puke ma ke ʻano he pepa noi puka no kona kēkelē MA). Wahi āna, ua ʻike ka poʻe e alakaʻi ana i ka hoʻonaʻauao keiki e pilikia ana nā keiki i ke aʻo ʻana ma o ka ʻōlelo ʻAiliki, akā, ua koho lākou e hana pēlā i mea e ola ai ka ʻōlelo ʻAiliki. ʻAʻole i ikaika ka paipai ʻia o ka ʻōlelo ma waho o ke kula, a he pilikia nui kēia, i kona manaʻo. Nui ka hoihoi, a manaʻo au he waiwai nui kēia puke iā kākou, ka poʻe e hoʻōla ana i ka ʻōlelo Hawaiʻi i kēia manawa. Nui nā haʻawina waiwai e aʻo ai. E kākau hou au ke pau ka puke i ka heluhelu ʻia.

Ma hope o ka ʻaina ahiahi, ua nīnauele aku ai i kekahi kumu kula haʻahaʻa, ʻo Fiona kona inoa. He kumu hou ʻo ia; ʻakahi ʻo ia a puka me kona palapala hōʻoia no ke aʻo ʻana, a he kūlana kūhelu kona ma kekahi kula ma Dublin. He kula ʻōlelo Pelekāne ia, akā, koi ʻia ke kula e aʻo i ka ʻōlelo ʻAiliki i loko o ka papa. ʻAʻole lākou aʻo i nā kumuhana ʻē aʻe ma o ka ʻōlelo ʻAiliki, akā, hoʻāʻo ʻo ia e hoʻohana i ka ʻōlelo ʻAiliki ke hiki ma ke aʻo ʻana i nā kumuhana like ʻole. ʻOiai he kumu kula haʻahaʻa ʻo ia, nāna e aʻo i nā kumuhana a pau i nā haumāna. Wahi āna, ʻaʻole ʻōlelo ʻAiliki ka hapanui o nā kumu o ke kula me ka mākaukau, hiki nō naʻe iā lākou ke heluhelu.

Hoihoi kāna moʻolelo i haʻi mai ai no ke koi ʻia o nā kumu e noho no kekahi hōʻike ana mākaukau no ka ʻōlelo ʻAiliki. Koi ʻia ʻo ia e hele i kekahi hale ma kahi mamao loa, ʻaʻole ʻo ia i uku ʻia, a nāna e uku no ke hele ʻana i laila a me kahi āna i noho ai. ʻEkolu lā ka lōʻihi o ka hōʻike ana mākaukau, a ʻaʻole ʻo ia ʻike inā he puka a hāʻule paha kona a hala ʻekolu mahina. ʻIke ʻo ia i ke koʻikoʻi o ka mākau ʻōlelo ʻAiliki, akā, ukiuki loa ʻo ia i ke ʻano o ka hōʻike ana mākaukau no ka ʻōlelo ʻAiliki – ʻaʻohe ona pili i ke ʻano o ka hana a nā kumu i loko o ka papa. Wahi āna, ʻaʻole ʻo ia i ʻōlelo ʻAiliki i loko o kāna papa no ka hoʻokahi pule ma hope o ka hōʻike, ma muli o kona ukiuki i ke Keʻena Hoʻonaʻauao o ke Aupuni a me ke ʻano o ka hōʻike.

Lohe nui au i kēia ʻano manaʻo ma waena o ka poʻe he nui ma ʻaneʻi – ʻaʻole i kākoʻo ʻia ka hoihoi o ka poʻe i loko o nā kula a me nā keʻena hoʻonaʻauao; kaohi ʻia ko lākou ʻiʻini i ke ʻano o ka hāmale ʻia o lākou, a me ka nui o ka “lele hupa” ʻana i koi ʻia. I kēia manawa, e aʻo ana ma kahi o ka 1,000 kumu i loko o nā kula me ka loaʻa ʻole o kekahi kēkelē a i ʻole ka palapala hōʻoia ma ka hoʻonaʻauao, a ke nui aʻe nei ka pilikia ma muli o ka nui ʻana aʻe o ka poʻe ma ʻIlelani. Ua pani ʻia kekahi kulanui hoʻonaʻauao ma ʻIlelani ma kahi o ka makahiki 1985, no ka mea, ma ia wā ua nui ka poʻe e haʻalele ana iā ʻIlelani ma muli o ka liʻiliʻi o nā kūlana hana ma ʻaneʻi. Pēlā i emi ai ka nui o ka poʻe ma waena o ka makahiki 1980 a me ka makahiki 1990. A laila, ua pōmaikaʻi nā pāʻoihana like ʻole ma ʻIlelani, nui ka poʻe malihini e kipa mai ana, a nui ka poʻe e komoneʻe ana i loko o ʻIlelani. Manaʻo ʻo ia e nui aʻe ana ka pilikia o nā kula no nā makahiki he nui e hiki mai ana inā ʻaʻohe loli o ke ʻano o ke Keʻena Hoʻonaʻauao o ke aupuni. He poʻe ʻelemākule wale nō lākou, i kona manaʻo, a pēlā ke ʻano o ko lākou noʻonoʻo ʻana. Ua hoʻohana ʻia ka moʻohaʻawina i hoʻopuka ʻia ma ka makahiki 1971 a hiki i ka makahiki 1997, a ʻaʻole i pani ʻia nā puke haʻawina a pau a hiki i kēia manawa. No ke aʻo ʻana i ka ʻōlelo ʻAiliki i loko o ka papa, ke hoʻohana ʻia nei ka puke haʻawina like i hoʻopuka ʻia ma ka makahiki 1971, a ʻaʻole i makemake iki ʻia e nā kumu.

ʻŌlelo ʻo Fiona, hoihoi nā keiki i ke aʻo ʻana ma o ʻōlelo ʻAiliki inā ʻaʻole lākou i haʻi ʻia – “e aʻo ana kākou i ka ʻōlelo ʻAiliki i kēia manawa.” Ke lohe ʻia ia ʻano ʻōlelo, pau ko lākou hoihoi i ka haʻawina. Hoʻāʻo ʻo ia e hoʻomākaukau i nā haʻawina a me nā pāʻani hoihoi ma ka ʻōlelo ʻAiliki, akā, ʻaʻole ʻo ia haʻi i nā haumāna he haʻawina pilinaʻōlelo ʻAiliki ia. Manaʻo lākou he ao ʻilihune a naʻaupō ke ao ʻAiliki, a he ao waiwai a naʻauao ke ao ʻōlelo Pelekāne, no laila, hoʻāʻo lākou e piʻi aʻe i ko lākou kūlana ma ke kaiapili ma ka waiho ʻana i ka ʻōlelo ʻAiliki a me ke komo ʻana i ke ao ʻōlelo Pelekāne.
5:32:46 PM.

Po‘akahi, 8 Iulai, 2002

Ua hoʻomaka kā mākou papa hou i kēia lā; ʻo Caira ka inoa o ke kumu. I nehinei, ua ʻōlelo ʻo ia e nāʻana ana mākou i nā mea a mākou i aʻo ai i kēlā pule aku nei, akā, i kēia lā ua komo piha mākou i ke aʻo ʻana i nā mea hou. ʻO nā mea nui a mākou i aʻo ai, ʻo ia ke aʻo ʻana i nā inoa kūlana hana, e like hoʻi me ka mākaʻi, ke kumu, ka mea kuke, ka mea kalaiwa, a pēlā aku, me ka ʻōlelo ʻana i ke ʻano o kā mākou hana. Ua aʻo pū mākou e ʻōlelo no nā ʻano hana leʻaleʻa a mākou e makemake ai, e like hoʻi me ka pāʻani pōhinaʻi, ka hīmeni, ka heluhelu, a pēlā aku.
E like me kā mākou mau papa ʻē aʻe, ʻaʻole kālele ʻo Coira ma ke aʻo ʻana i ka pilinaʻōlelo, akā, kālele ʻo ia ma ka hoʻopuka ʻana i ka ʻōlelo. Ma hope o kā mākou hoʻopuka ʻana i kāna i ʻōlelo mai ai, paipai ʻo ia iā mākou e kākau i kā mākou i lohe ai, a laila, kākau ʻo ia ma ka papa ʻeleʻele. ʻOiai paʻakikī ka pela ʻana i ka ʻōlelo ʻAiliki, makemake ʻo ia e paʻa nā kani, a kākau mākou e like me kā mākou e lohe ai.

Nui nā huaʻōlelo ʻAiliki a mākou i aʻo ai i like kona manaʻo ma ka huaʻōlelo Pelekāne. No kekahi, he mau huaʻōlelo lawekahiki paha, e like hoʻi me líomóid (“lemonade”). No kekahi, ua like paha ka mole kumu o ka huaʻōlelo ma nā ʻōlelo ʻelua; ʻo beorach (“beer”) paha kekahi. ʻAʻole i ʻike ʻia ka mole kumu o nā huaʻōlelo ma nā puke wehewehe ʻōlelo ʻAiliki i loaʻa iā māua; e pono ana au e huli i kekahi mea i loaʻa kēia ʻano ʻike.

ʻElua analula ʻokoʻa o ka ʻōlelo ʻAiliki i like me ka pepeke painu ma ka ʻōlelo Hawaiʻi,

Nīnau: Makemake ʻoe i ka pia?
ʻAe: Makemake au i ka pia.
Hōʻole: ʻAʻole au makemake i ka pia.

Nīnau: An maith leat beorach?
Is good to you beer?
ʻAe: Ba mhaith liom beorach.
Is good to me beer.
Hōʻole: Ní mhaith liom beorach.
Is good to me beer.

Hiki ke ʻike ʻia, ʻaʻohe loli o ke kaʻina huaʻōlelo ʻAiliki, akā, loli nā huaʻōlelo. He mea nui ka huaʻōlelo ʻAiliki no “is,” a ʻaʻohe ona huaʻōlelo like ma ka ʻōlelo Hawaiʻi. Hoʻomaka kēia ʻano hopunaʻōlelo ma “is” a i ʻole “is not,” a nui nā kinona huaʻōlelo no ia manaʻo ma ka ʻōlelo ʻAiliki. ʻO kekahi ʻokoʻa nui, ʻaʻole kū kaʻawale nā ʻami a me nā papani. Hoʻohui ʻia kēia mau mea ʻelua ma hoʻokahi huaʻōlelo. Ua like ʻo “leat” me “iaʻu,” a like ʻo “liom” me “iā ʻoe.” Hōʻike pū ʻia ke keka ma nā papani ma ka ʻōlelo ʻAiliki; ʻokoʻa nā huaʻōlelo no “he/his” a me “she/her.”

Lāpule, 7 Iulai, 2002

Ua hoʻomaka nā papa hou ma ka ʻauinalā, a ʻelua wale nō hola ka lōʻihi. Ma ke kakahiaka, ua haʻi ʻia mai māua ʻaʻole e loaʻa ana ka papa kūlana ʻelua, no ka mea, nui ʻino nā haumāna i loaʻa ʻole kekahi ʻike no ka ʻōlelo ʻAiliki. No laila, e loaʻa ana ʻelua papa kūlana haʻahaʻa loa, a e pono ana paha māua e komo hou i loko o ia papa hoʻokahi a māua i komo ai ʻelua pule aku nei. Akā naʻe, ua lawa nō nā haumāna no ka mālama ʻana i ka papa no nā haumāna i hele mua i ka papa ʻōlelo ʻAiliki. ʻO ka nāʻana wale nō kā mākou i hana ai i kēia lā.
Nui nō nā haumāna i hele mai Wisconsin mai; he mau haumāna kēia na kekahi kumu ma ke kulanui o Wisconsin ma Milwaukee. Wahi a ka lohe, he mānaleo ʻōlelo ʻAiliki ʻo ia, no laila, e huli ana au iā ia i ka lā ʻapōpō, me ke noi e nīnauele aku au iā ia no kēia puke moʻomanaʻo.

Ua manaʻo māua ʻo Mālia e hele i Biddy’s i kēia pō no ka hoʻolohe ʻana iā Paddy mā, akā, he ua nui nō ko kēia pō, a ʻaʻohe kaʻa e kau ai, no laila, ua hoʻomaha wale nō māua ma ka hale, me ka hoʻopaʻa pū ʻana i nā haʻawina.