Ireland 2002

Po‘alua, 25 Iune, 2002

Ua hoʻomau mākou i ke aʻo ʻana i nā analua hou i kēia lā. ʻAʻole nui nā huaʻōlelo a mākou e aʻo ana, akā, nui nō nā analua. Hoihoi nō ke ʻano o nā haʻawina hoʻomaʻamaʻa i loko o ka papa; nui ka walaʻau ʻana o nā haumāna ma waena o mākou, a loaʻa nō nā pāʻani no ka hoʻomaʻamaʻa ʻana. Mau ke kālele ʻia o ka puana ʻana a me ka hoʻolohe ʻana, akā, ʻike au i kekahi o nā analua o ka pilinaʻōlelo. E kākau paha au no kēia i kēia hopenapule. E hui ana mākou ma ka lumi nui o ke kula i kēia pō no ke aʻo ʻana i kekahi mau mele ʻAiliki. ʻAʻole māua i hele i ka hale inu pia i kēia pule ma muli o ka nui o ka hoʻopaʻa haʻawina. Wahi a ka lohe, he lā maikaʻi ka Poʻakolu no ka hele ʻana i Biddy’s (he hale inu pia kaulana o kēia ʻāina) a me ka hoʻolohe ʻana i ka poʻe hoʻokani pila kaulana o ʻIlelani. I laila ana nō māua e hele ai i ka lā ʻapōpō.
Ua walaʻau au me kā māua kumu, ʻo Etna kona inoa, ma ka wā hoʻomalolo i kēia lā; i kona wā ʻōpio he haumāna ʻo ia ma kekahi o nā kula kaiapuni ʻAiliki, a he kumu kula haʻahaʻa ʻo ia ma kekahi kula kaiapuni ʻē aʻe i kēia manawa. ʻAno like nō kekahi o nā pilikia o ia mau kula me ka pilikia o nā kula kaiapuni Hawaiʻi. Nui ka makemake o nā mākua e hele nā keiki a lākou i ia mau kula, eia naʻe, ʻaʻole lākou ʻōlelo ʻAiliki (ka hapanui), a ʻaʻohe o lākou ʻiʻini e aʻo. Me he mea lā, nui nā pāhana hoihoi o nā kula ma ka papahana kaiapuni ʻAiliki i loaʻa ʻole ma nā kula ʻōlelo Pelekāne, a ʻo ia kekahi kumu e makemake nui ai nā mākua e hoʻouna i nā keiki i ia mau kula. ʻAʻole i maikaʻi loa nā puke a me nā haʻawina ma ka ʻōlelo ʻAiliki, a ʻano kahiko ka hapanui kekahi. Hoʻomākaukau nui nā kumu i kā lākou mau haʻawina no ke aʻo ʻana ma ka papa. Wahi a Etna, he pae kiʻekiʻe ka ʻōlelo ʻAiliki ma nā puke haʻawina i hāʻawi ʻia iā lākou, a ʻoiai ʻo ka ʻōlelo ʻAilkiki ka ʻōlelo ʻelua o ka hapanui o nā haumāna, ʻaʻole lākou mākaukau no ka heluhelu ʻana i ia mau puke haʻawina.

No Etna, ʻaʻole he mea nui ke aʻo ʻana ma kekahi kula kaiapuni ʻAiliki. Na ke keʻena hoʻonaʻauao o ke aupuni e koho i kahi āna e aʻo ai. Inā haʻi ʻia ʻo ia e aʻo ma kekahi kula ʻōlelo Pelekāne, e hele aku nō ʻo ia e aʻo i laila, a e haʻalele ʻo ia i ka papahana kaiapuni ʻAiliki.

Leave a Reply

Your email address will not be published. Required fields are marked *