ʻO kēia ka lā hope o ka papa no ke ao kūlohelohe, a ua hele mai kekahi kumu hou, ʻo John Boyle kona inoa, no ke aʻo ana iā mākou e pili ana i nā manu ʻIlelani. Hoʻomaka aku nei ʻo ia me ka wehewehe ʻana i ke ʻano o nā manu, a pehea e ʻike ai i ka ʻokoʻa ma waena o kekahi mau lāhui manu. Ma hope o kāna haʻiʻōlelo pōkole, ua uhaele aku mākou i “Rocky Point,” he lae ma ke komohana loa o ke kalana ʻo Co. Donegal. ʻAʻole i ʻike ʻo John i ka inoa ʻAiliki no ia wahi, a ʻaʻole au i ʻike ma ka palapala ʻāina ma ke kula. Waiho ʻia aku nei ko mākou mau kaʻa ma kekahi hale, a hele wāwae mākou ʻelua paha mile ma luna o ka nāele a hiki i Rocky Point no ka nānā ʻana i nā manu o laila. ʻAʻole naʻe i ʻike ʻia kekahi manu a mākou i ʻike ʻole ai ma kahi o ke kula. ʻO kēia paha ka lā nani loa o kā māua noho ʻana ma Glen Colm Cille, ua pā mehana mai ka lā, a ʻaʻohe ua.
Ua hele pū māua me kekahi kāne no ka ʻaoʻao hema o ʻIlelani, ʻo Michael Collins kona inoa. ʻO ia ka inoa o kekahi kanaka kaulana ma ʻIlelani, a pūʻiwa maoli nō māua i ka lohe ʻana ʻo ko māua hoapapa ka ʻohana keiki o ia Michael Collins kaulana. ʻO kona ʻanakala kekahi o nā alakaʻi o ke kaua kūʻokoʻa o ʻIlelani ma kahi o ka makahiki 1921. Ua pepehi ʻia kona ʻanakala e nā koa Pelekāne ma mua o ke hoʻokumu ʻia o ka Lepupalika ʻo ʻIlelani ma ka makahiki 1921, akā naʻe, hoʻohālikelike ʻia ʻo Michael Collins me Keoki Wakinekona ma ʻAmelika.
Ua luhi maoli nō au ma hope o ka huakaʻi, a ua noho wale nō au ma ka hale i kēia ahiahi no ka nāʻana ʻana i nā haʻawina ʻōlelo ʻAiliki o kēlā pule aku nei. ʻOiai e haʻalele ana kekahi o ko Mālia mau hoa i ka lā ʻapōpō, ʻo Marie Pierre kona inoa (no Palani mai ʻo ia), e hele ana lāua i Biddy’s i kēia pō no ka hoʻolohe ʻana i ka poʻe hoʻokani pila.
