Ireland 2002

Lāpule, 23 Iune, 2002

Me he mea lā ua hele a maʻa ko māua mau kino i ka noho ʻana ma ʻIlelani nei; ua hiamoe māua a hiki i ka hola 9 o ke kakahiaka. Nui kā māua walaʻau pū ʻana me nā haumāna ʻē aʻe i kēia lā, ma ka hale a māua e noho ana a ma ke kula kekahi. He kanahākūmālima haumāna o ke kula i kēia pule, a ma ka hoʻokaʻawale ʻana i nā pūʻulu haumāna, ʻeono wale nō mākou ma ke kūlana haʻahaʻa. Nui nō nā haumāna i hiki ke ʻōlelo ʻAiliki i kēia pule, a aia lākou ma ke kūlana ʻelua a me ke kūlana ʻekolu.

ʻElua wale nō hola o ka papa i kēia lā, a ua hoʻomaka mākou me ke aʻo ʻana i nā ʻikioma maʻalahi, me nā nīnau a me nā pane e lohe pinepine ʻia – “ʻo wai kou inoa?, ” “pehea ʻoe?” a pēlā aku. ʻAʻole mākou i ʻike i ka pela ʻana i kā mākou i aʻo ai a hiki i ka pau ʻana o ka papa. Wahi a ke kumu, makemake lākou e kālele ma ka puana ʻana a me ka lohe ʻana i ka ʻōlelo, ʻaʻole ma ka pilinaʻōlelo a me ka pela ʻana. ʻAʻole maʻalahi ka pela ʻana i nā huaʻōlelo ʻAiliki, nui nā koneka i pela ʻia, akā, ʻaʻole i puana ʻia, a pēlā pū nō hoʻi kekahi o nā woela. A nui nā kūʻē lula kekahi. Ma kekahi mau huaʻōlelo, like ka puana ʻia o ka “bh” me ka “w” haole, i kekahi manawa me ka “v” haole, a i kekahi manawa ʻaʻole i puana ʻia. ʻO “bainne” ka huaʻōlelo ʻAiliki no ka waiū, akā, ʻaʻole i puana ʻia ka “i”, a like ka puana ʻia o nā “n” me ka “ñ” paniolo. Wahi a kekahi haumāna, he hapa Yiddish a he hapa Klingon ke ʻano o ka puana ʻia o ka ʻōlelo ʻAiliki.

ʻAno nui nō kā mākou i aʻo ai ma ka ʻelua wale nō hola, akā, pono māua e hoʻomaʻamaʻa. Ma ka hola 8:30 e hui ana mākou nā haumāna ma ka lumi nui o ke kula no ke aʻo ʻana i ka hulahula Ceili.

Leave a Reply

Your email address will not be published. Required fields are marked *