Ireland 2002

Monday, 1 Iulai, 2002

I kēia lā, ua aʻo mākou no ka mōʻaukala o nā kānaka ma ʻIlelani. ʻAʻohe kanaka o ka wā mesolithic; ʻike ʻia nā mea hana mua a nā kānaka ma kapakai ma ʻō a ma ʻaneʻi ma ka wā neolithic (ma kahi o ka makahiki 7000 B.C.) Na kēia poʻe i kūkulu i nā hē, nā pā pōhaku, a me nā kiʻi pōhaku a mākou i ʻike ai i kēia lā. Ua ola lākou ma mua o ka hiki ʻana mai o ka poʻe Celts ma kahi o ka makahiki 300 A.D. ʻO nā mea hana pōkaku a me nā mea wale nō a mākou i ʻike ai nā mea a lākou i waiho ai. ʻAʻole maopopo leʻa ka poʻe kālaikanaka no hea mai kēia poʻe, akā, like nā mea hana pōhaku a lākou i hana ai me kā ka poʻe o Palani i hana ai ma ia wā hoʻokahi. Manaʻo kekahi poʻe no Sekotia ka poʻe mua i hiki mai i ʻIlelani, a ma luna paha o kekahi ʻāpana ʻāina i loaʻa ma waena o ʻIlelani a me Sekotia i ia wā. Ua piʻi aʻe ke kai ma hope, a i kēia manawa ʻaʻole i loaʻa ia “uapo” ma waena o Sekotia a me ʻIlelani, akā, ʻaʻole i hohonu ke kai ma waena.
Ua kaʻi mākou nā haumāna o ka papa ma kahi o ka 3 mile i kēia lā, no laila, luhi maoli nō māua ʻo Mālia i kēia manawa. Ua hele hou mai ʻo Paddy ma ka wā awakea no ke aʻo hou ʻana mai iaʻu i ka hoʻokani bodhrán. Nui kona hauʻoli i koʻu holomua, a e hele hou mai ana ʻo ia ma ka Poʻakolu. Waiho ʻo ia i kekahi pā sēdē i loaʻa nā mele ʻAiliki no ka hoʻomaʻamaʻa pū ʻana. ʻAʻole au i nānā iki i nā haʻawina ʻōlelo ʻAiliki i kēia lā; ʻo ia ana kaʻu i kēia pō.

Leave a Reply

Your email address will not be published. Required fields are marked *