Ireland 2002

Po‘akolu, Iune 19, 2002

Ua pae māua ʻo Mālia ma Dublin ma ka hola 8 o ke kakahiaka. He ʻumikūmāono hola ka lōʻihi o ka lele ʻana (he ʻumi hola a hiki i Newark, NJ) a ʻeono hola no ka lele ʻana i Dublin mai laila mai, akā he ʻumi hola ka lōʻihi o ka noho ʻana ma Newark. Ua hoʻolimalima māua i lumi hōkele ma laila no ka hoʻomaha ʻana, a laila, ua hoʻi akula i ke kahua mokulele. Ua piha loa ka mokulele mai Newark i Dublin, no laila, ua hoʻoneʻe ʻia māua i ka māhele o mua loa o ka mokulele (First Class nō hoʻi!), no laila, ua leʻaleʻa nō ia māhele o ka huakaʻi.

Ma muli o ka hola a māua i hiki mai ai, nui ʻino nā kaʻa ma ke alanui a ʻano lōʻihi nō ke kalaiwa ʻana i ka hōkele. ʻIke ʻia nā hōʻailona he nui i kākau ʻia ma ka ʻōlelo ʻAiliki ma ke kahua mokulele, me ka ʻōlelo Pekelāne pū. ʻIke ʻia nā hōʻailona ʻōkuhi no ka poʻe malihini ma nā ʻōlelo ʻelua. Ma kaʻu walaʻau pū ʻana me ke kanaka nāna i kalaiwa mai iā māua i ka hōkele (poina ʻia ihola kona inoa), haʻi mai nei ʻo ia iā māua ʻaʻole i lohe nui ʻi ka ʻōlelo ʻAiliki ma Dublin. Kākau ʻia nā inoa o nā alanui ma nā ʻōlelo ʻelua (hoʻokau ʻia ka ʻōlelo ʻAikiki ma luna o ka ʻōlelo Pelekāne), a mea mai ke kanaka kalaiwa, pēlā nō mai kona wā ʻōpio. ʻAʻole ʻo ia ʻōlelo ʻAiliki, paʻa nō nā huaʻōlelo ʻAiliki iā ia a hoʻopuka nō ʻo ia ma kāna ʻōlelo Pelekāne ʻana, ʻaʻole naʻe ʻo ia ʻōlelo ʻAikiki. I kona manaʻo pēlā nō ka hapanui o ka poʻe o kona wā (60 paha ona makahiki).

He mau kānela lēkiō ma ka ʻōlelo ʻAiliki (ma ka ʻōlelo ʻAiliki, he “Gaeilge” ka inoa o ka ʻōlelo). He kānela kīwī ma ka ʻōlelo ʻAiliki kekahi, a ua nānā ihola māua i ka polokalamu kūkala nūhou ma ka ʻōlelo ʻAiliki a me kekahi polokalamu i ʻano like me nā “‘ʻōpela kopa” ma ʻAmelika. Ma ka polokalamu kūkala nūhou, ʻaʻole i lohe ʻia ka ʻōlelo Pelekāne, a ʻaʻole i ʻike ʻia ka lepe unihi ma lalo o ka papakaumaka. Mā na polokalamu ʻōpela kopa, hoʻokau ʻia nō ka lepe unuhi ma lalo o ka papakaumaka, a lohe ʻia ka hoʻolaha pāʻoihana ʻōlelo Pelekāne ma waena o nā polokalamu. Lohe ʻia nō nā ʻōlelo Pelekāne pōkole i loko o nā ʻōlelo ma ia mau polokalamu kekahi, ʻo “Give me a break,” “Well…,”a me “By the way…” kekahi o nā ʻōlelo aʻu i lohe ai.

ʻAʻohe ua o Dublin i kēia lā, mea mai ka mea kalaiwa, he mau lā ua ko kēlā me kēia pule, ua pōmaikaʻi māua i ka hiki ʻana mai ma kēia lā maikaʻi.

 

Leave a Reply

Your email address will not be published. Required fields are marked *