Ua haʻalele māua iā Dublin i kēia lā no ka hele ʻana i ke kula ʻo Oideas Gael ma Glen Colm Cille, Co. Donegal. ʻElima hola ka lōʻihi o ke kalaiwa ʻana, a ma ka hiki ʻana mai ua hoʻokipa ʻia māua e ka luna o ke kula, ʻo Liam Ó Cuinneagáin kona inoa. Nui nā kaona liʻiliʻi ma ke ala hele, a nui nā hale nani hou ma ʻō a ma ʻaneʻi. Wahi a Liam, he mau hale wā hoʻomaha nā hale hou no ka poʻe waiwai no Dublin a me Belfast.
Ma ka hola ʻeiwa o ke ahiahi ua hui nā haumāna hou ma ka hale kula ʻo Oideas Gael no ke aʻo ʻana i ka papahana o ka pule e hiki mai ana. He 45 haumāna ko kēia pule, a e hoʻokaʻawale ʻia ana ʻekolu pūʻulu haumāna, mai ke kūlana haʻahaʻa o ka ʻike no ka ʻōlelo ʻAiliki, a hiki i ke kūlana kiʻekiʻe no nā haumāna mākaukau loa. Hoʻomaka ka papa o ka lā ʻapōpō ma ka hola 2:30, akā, ma ka Poʻakahi e hoʻomaka ʻana ka papamanawa maʻamau o ke kula – mai ka hola 10 a hiki i ka hola 12 ka papa o ke kakahiaka, a mai ka hola 2 a i ka hola 5 ka papa o ka ʻauinala. Wahi a Liam, e kālele ʻia ana ka walaʻau ʻana a me ka lohe ʻana i ka ʻōlelo ʻAiliki, ʻaʻole e nānā nui ʻia ana ka pilinaʻōlelo a me ka pela ʻana i kēia papa. Eia naʻe, hiki i nā haumāna ke walaʻau me nā kumu no ke aʻo ʻana i ia mau mea.
Ma mua, ma waena, a ma hope o nā papa e loaʻa ana nā ʻano hanana like ʻole. Ma hope o ka papa o ka lā ʻapōpō, e hele mai ana kekahi e aʻo i ka hulahula Ceili, ʻo ia hoʻi, ke ʻano hulahula i ʻike ʻia ma ka hōʻike “Riverdance” a me “Lord of the Dance.” Hiki ke ʻike ʻia ka moana nui ma ke komohana, a ma kahi o ka hola 10:30 PM i nāpoʻo ai ka lā. He lā lōʻihi loa kēia (ua ala aʻe māua ma ka hola 4 o ke kakahiaka nui, no laila, pono kēia e hiamoe.
