Lāpule, 7 Iulai, 2002

Ua hoʻomaka nā papa hou ma ka ʻauinalā, a ʻelua wale nō hola ka lōʻihi. Ma ke kakahiaka, ua haʻi ʻia mai māua ʻaʻole e loaʻa ana ka papa kūlana ʻelua, no ka mea, nui ʻino nā haumāna i loaʻa ʻole kekahi ʻike no ka ʻōlelo ʻAiliki. No laila, e loaʻa ana ʻelua papa kūlana haʻahaʻa loa, a e pono ana paha māua e komo hou i loko o ia papa hoʻokahi a māua i komo ai ʻelua pule aku nei. Akā naʻe, ua lawa nō nā haumāna no ka mālama ʻana i ka papa no nā haumāna i hele mua i ka papa ʻōlelo ʻAiliki. ʻO ka nāʻana wale nō kā mākou i hana ai i kēia lā.
Nui nō nā haumāna i hele mai Wisconsin mai; he mau haumāna kēia na kekahi kumu ma ke kulanui o Wisconsin ma Milwaukee. Wahi a ka lohe, he mānaleo ʻōlelo ʻAiliki ʻo ia, no laila, e huli ana au iā ia i ka lā ʻapōpō, me ke noi e nīnauele aku au iā ia no kēia puke moʻomanaʻo.

Ua manaʻo māua ʻo Mālia e hele i Biddy’s i kēia pō no ka hoʻolohe ʻana iā Paddy mā, akā, he ua nui nō ko kēia pō, a ʻaʻohe kaʻa e kau ai, no laila, ua hoʻomaha wale nō māua ma ka hale, me ka hoʻopaʻa pū ʻana i nā haʻawina.

Leave a Reply

Your email address will not be published. Required fields are marked *

Back To Top