ʻO kēia ka lā mua i piha i nā papa. ʻEkolu hola o ka papa o ke kakahiaka, a ʻelua hola o ka papa ʻauinalā. Nui ʻino nā analua a mākou i aʻo ai ma ka papa, a ua komo kekahi o nā haumāna i hoʻāʻo mua i ke kūlana ʻelua, akā, ʻaʻole lāua i mākaukau no ia kūlana. No laila, ʻewalu mākou i kēia manawa. Nui nō nā ʻikioma a mākou i aʻo ai, a me nā huaʻōlelo hou kekahi. Wikiwiki nō hoʻi ke ʻano o ke aʻo ʻana, a ʻaʻole i paʻa pono nā haʻawina iaʻu, e like me nā haʻawina a mākou i aʻo ai i nehinei.
ʻO ka pela a me ka puana ka pilikia nui o ka hapanui o nā haumāna, a pēlā pū nō hoʻi e pilikia ai au.
No Cork ke kumu, a wahi āna, ʻokoʻa ka puana ʻana o nā woela a me nā koneka he nui ma laila. He palauahae ʻokoʻa ko Ulster, a ʻo ia ke ʻano o ka palauahae ma Glen Colm Cille nei. I kekahi manawa puana hewa ʻo ia ma ke ʻano o ko Cork, a hoʻopololei ʻo ia iā ia iho, akā, he mea ia e huikau ai nā haumāna. He palauahae dialect ʻokoʻa ko ʻIlelani Hema kekahi, no laila, ʻekolu palauahae nui o kēia aupuni. Ma kaʻu walaʻau pū ʻana me kekahi o nā haumāna, hoʻopololei mau ʻia kā lāua puana ʻana e ko ʻaneʻi, a ukiuki lāua i ka holomua ʻole o kā lāua ʻōlelo ʻAiliki ʻana ma muli o ka ʻokoʻa o ka puana ʻana. Loaʻa nō kekahi ʻōlelo ʻAiliki “kūhelu” i kākoʻo ʻia e ke aupuni, a hoʻohana ʻia kēia ʻōlelo ma nā kānela lēkiō a kīwī i kākoʻo ʻia e ke aupuni, akā, makemake ka poʻe o nā wahi like ʻole e mālama i ke ʻano o ka ʻōlelo a kō lākou mau kūpuna, a ʻaʻole lākou makemake e loli ke ʻano o ka puana ʻana.
Haʻi ʻia aku nei au ua hele kekahi o nā kumu o kēia kula i kekahi kula Gaelscoileanna mai kona wā kamaliʻi a hiki i ka puka ʻana mai ke kula kiʻekiʻe. E huli ana au iā ia i ka lā ʻapōpō me ke noi e nīnauele aku au iā ia no ke ʻano o ka hele ʻana i ia ʻano kula.
Ma ka hola 8:30 o ke ahiahi ua hele wāwae mākou ma ke awāwa o Glen Colm Cille no ka nānā ʻana i kekahi mau hē a me nā kiʻi pōhaku i kūkulu ʻia ma mua o ka hiki ʻana mai o ka poʻe kalikiano, a me kekahi mau hale pule kalikiano kekahi. ʻElua paha mile ka lōʻihi o ka hele wāwae ʻana, a ʻakahi nō au a hoʻi mai i ka hale. ʻO ka hola ʻumikūmākahi kēia, a pono au e hoʻopaʻa haʻawina ma mua o ka hiamoe ʻana.
